ब्लॉग - ललाटलेख - कविता - ललाटलेख

ब्लॉग - दिनांक - २४/०१/२०१६

आपणा साऱ्यांना आपला  ललाटलेख वाचून घेण्याची / भविष्य जाणून घेण्याची किती उत्सुकता असते, त्याच उत्सुकतेमधून ज्योतिषशास्त्राची आवड निर्माण झाली पण फार प्रगती करता येत नाही कारण त्यासाठी लागणारा अभ्यास करणे होत नाहीये. ही आवडही स्वान्तसुखाय त्यामुळेही ह्या विषयात प्रगती करण्याची इच्छा कधी झाली नाही.

तरीही अभ्यास म्हणून, कुतूहल म्हणून कधीतरी कुणाची पत्रिका पाहतो, ते करताना एक जाणवले की काही वेळा पत्रिकेतले कोडे  अगदी सहज सुटू लागते तर काही काही पत्रिकेच्या बाबतीत ते जमतच नाही. पत्रिका त्यातले ग्रह, तारे, नक्षत्रे  काहीच बोलत नाही, संवाद साधत नाही. असे का घडावे? - अपुरे ज्ञान, अनुभव हे कारण तर खरेच पण जे ज्ञान आहे, जी पद्धत माहिती आहे ती एका कुंडलीला  लागू पडते पण तशाच दुसऱ्या कुंडलीला लागू पडत नाही.  ह्या साऱ्या पार्श्वभूमीवर झालेली ही कविता ...

कविता – ललाट लेख – मुंबई विमानतळ - दिनांक २६-११-२०१५

(लेखन – मुंबई विमानतळावर दिनांक २६-११-२०१५ सकाळी – नागपूरला पोचल्यावर दिवसभर)

सटवाई कडून तू लिहिलेला

ललाटलेख वाचण्यासाठी

ग्रह नक्षत्रांचा आराखडा घेऊन

माझ्यापुढे कुणाचेही येणे

समजते मला आपोआप

तुला खेळायचा आहे खेळ

तू लपण्याचा मी तुला शोधण्याचा

तुझ्या असण्या नसण्याचे

न संपणारे कोडे सोडविण्याचा

अनेकांच्या ललाटलेखांत

ग्रह नक्षत्रांच्या आराखड्यात

आढळतच नाही तुझे दैवी तत्व

तुझ्या नसण्याची खात्रीच पटावी इतका

सापडतच नाहीस तू कितीही शोधले तरी

उलट कधी सहज उलगडतो

ललाटलेख सोबत तू ही 

त्या ग्रह-नक्षत्रांच्या आराखड्यातून

टाळाही बसतो त्या कुणाच्या उत्तरातून

अंदाजलेले भविष्य खरे होण्यातून मिळतो

तुला शोधल्याचा, समजल्याचा आनंद

जागते तुझ्या अस्तित्वाचे कोडे सुटण्याची आशा

पण पुढल्या अनेकांच्या बाबतीत

तू नसण्याची खात्री पटवत

तू गायब त्यांच्या ललाट लेखांतून

ग्रह-नक्षत्रांच्या आराखड्यातून

लपाछपिचा खेळ अर्धवट टाकून

अस्तित्वाचे कोडे गुंतागुंतीचे करून

ललाटलेख वाचून घेण्या

लोकांचे अनाहूतपणे येणे

त्यांत तुझे असणे नसणे

मला उमजणे न उमजणे

हे सारे निव्वळ योगायोग ?

वा तुझी माझ्यासाठीची खास योजना ?

ह्या प्रश्नांची उत्तरे कशी कळणार ?......

माझा ललाटलेख मीच कसा वाचणार  ?.......