दिनांक - ०४/०१/२०१५
कविता - संबंध
कविता - संबंध
(मूळ
कविता – १९९४-९५, पुनर्लेखन ०२/०१/२०१५ सकाळी ८.० ते ९.०)
प्रत्येकजण
ताणलेल्या, गोठलेल्या,
चिघळेल्या, तुटलेल्या
संबंधांनी ग्रासलेला
फरफटलेला, घायाळलेला ||
धोकादायकच झालंय संबंध बांधणे
कोण त्यांचा बाजार मांडेल
शिडी करून वर चढेल
सुखाना गळफास लावेल
ठरवताच येत नाही ||
‘कुठलाच संबंध नको’ च्या परिस्थितीत
सखे तू असतेस ग्रीष्माच्या उन्हाने
भाजलेल्या मातीसारखी
संबंधासाठी आतुरलेली
आडदांड पहिला पाऊस होऊन
कसही तुझ्यात सामावायचे
तुझ्या मृद्‍गंधासमवेत शतसहस्त्र होऊन
रुजून यायचे, वाढायचे फुला-फळायचे ||
मित्रा तू असतोस निरपेक्ष बहरलेला
आपुलकीच्या इंद्रधनु रंगानी रंगलेला
हव्याहव्याश्या गंधाने दरवळलेला
फक्त फुलपाखरू होऊन
तुझ्या रंगानी – गंधांनी लहडून जायचे ||
त्याचं असणे तर कणाकणात, चराचरात
कुठल्याही संबंधाने जाऊन त्याच्याकडे
मुक्त व्हायचे साऱ्याच संबंधातून ||
No comments:
Post a Comment