दिनांक - २५ / १२/२०१४
कविता – कालक्षण
(मूळ लेखन १९९५-९६, पुनर्लेखन २५/१२/२०१४)
कविता – कालक्षण
अनादी, अनंत, अनाकलनीय काळ
समस्त ब्रम्हांड, माणसे, त्यांच्या
संस्कृती, सृजने
सार सार त्याच्या अखंड प्रपातात वाहून
नेणारा ||
सर्वशक्तिमान, निर्मम, प्रपाती काळाचा
विचार
सर्वार्थाने छिन्नविछिन्न करीत असताना
तिच्या होकाराचा क्षण,
बाळाच्या पहिल्या स्पर्शाचा क्षण
आपले माणूस काळाआड जाण्याचा क्षण
असे अनेकानेक जिवंत क्षण
येतात अमृतकुंभ होऊन
जीवन संजीवनी घेऊन ||
जिजीविषा संपवणाऱ्या
अस्तित्व मिटवणाऱ्या
अज्ञातात ओढून नेणाऱ्या
निर्गुण, निराकार काळाचेच हे क्षण
आहेत आज तेच माझे जीवन
आहेत आज तेच माझे अस्तित्व ||
No comments:
Post a Comment