कविता – खूप पाहिले रंग दुनियेचे

दिनांक - २४/०४/२०१५ 

कविता – खूप पाहिले रंग दुनियेचे - मूळ लेखन०६/०२/१९९६; पुनर्लेखन १९/०४/२०१५

(मूळ लेखन०६/०२/१९९६ कोकणातल्या घरी दुपारी ३.० ते ३.२०, पुनर्लेखन १९/०४/२०१५ सकाळी ९.१५ ते ९.४५ बडोदे)

खूप पाहिले रंग दुनियेचे

आहे कोषात गुरफटून जायचे

जसा सुरवंट जातो कोषात

तंतूंच्या आतील काळोख्या समाधीत

आहे तसे उतरायचे कोषात मला

मिळविण्या आत्मभानाच्या इंद्रधनूला             ||

संपेन कदाचित आत

कुणाच्याही नकळत

मिळता आत्मभान

बदलेल कणनकण

लेवून दिव्य निळाई अंगभर

अगणित रंगप्रभा पंखांवर

तरंगत, बागडत वाऱ्याच्या लाटांवर

देत, घेत, पसरत आनंद सर्वभर

जगून सार्थकतेने

विखरून जाईन कणाकणाने                    ||